Hyggja á gjaldtöku í Raufarhólshelli

Áætlað er að hefja gjaldtöku í Raufarhólshelli í Ölfusi í byrjun næsta árs. Hópur fjárfesta hefur gert samning við landeigendur um leigu á hellinum og hyggja á að hefja skipulagðar ferðir í hellinn í byrjun næsta árs.

RÚV greinir frá þessu.

Umhverfisstofnun hefur áður lýst því yfir að gjaldtaka á svæðum sem eru á náttúruminjaskrá standist ekki lög. Í lögum um náttúruvernd er hins vegar ákvæði sem heimilar innheimtu gjalds fyrir þjónustu á friðlýstum svæðum og náttúruverndarsvæðum.

Raufarhólshellir er á náttúruminjaskrá og er fjórði stærsti hraunhellir landsins og sá stærsti utan Hallmundarhrauns.

Það er fyrirtækið Raufarhóll sem hefur gert samning við landeigendur um leigu á hellinum og nánasta umhverfi. Á bak við fyrirtækið stendur hópur fjárfesta, til að mynda Gufupressan ehf., sem er félag í eigu Skúla Gunnars Sigfússonar, sem kenndur er við Subway.

Hallgrímur Kristinsson, talsmaður fjárfesta, segir að áætlað sé að hefja skipulagðar ferðir í hellinn í byrjun næsta árs. Fyrirhugað er að setja upp aðstöðu fyrir móttöku ferðamanna og leggja meðal annars stíg inn í hellinn og koma fyrir ljósabúnaði. Hallgrímur segir að fyrirtækið vinni að því að fá tilskilin leyfi fyrir framkvæmdum.

Frétt RÚV