Hvítur kvígukálfur boðinn upp

Á Sunnlenska sveitadeginum sem fram fer á Selfossi næstkomandi laugardag, þann 3. maí milli kl. 15 og 16 mun Böðvar Pálsson, sveitarhöfðingi á Búrfelli, bjóða upp hvítan kvígukálf frá Læk í Flóahreppi.

Það er Guðbjörg Jónsdóttir, bóndi á Læk, sem ánafnar sýningunni kálfinn til minningar um mann sinn, Gauta Gunnarsson. Litarhaft kálfsins er einstakt en hann alhvítur og eru slíkir gripir fáséðir. Ágóðinn af uppboðinu rennur til góðra mála.

Fyrirhugað er að uppboði loknu fari kálfurinn hvíti í Húsdýragarðinn í Reykjavík, en þar starfaði Gauti í nokkur ár sem yfirdýrahirðir við góðan orðstýr eða allt þar til hann hætti til að taka við draumstarfinu sínu og köllun að gerast bóndi. Sá draumur rættist er hann fluttist að Læk í Flóahreppi ásamt fjölskyldu sinni, en Gauti lést af völdum krabbameins á síðasta ári, langt um aldur fram, frá konu og fjórum börnum sem hafa ákveðið að bregða búi.

Fjölskyldan hefur kynnst mikilvægi þess að hafa sjúkrahús í heimabyggð bæði fyrir sjúklinga og aðstandendur þeirra og langar að þakka fyrir sig með þessum hætti. Kálfurinn hefur sérstaka merkingu fyrir fjölskylduna á Læk, í senn tákn um von og bjartari tíma.

Viðeigandi er að í samvinnu við forsvarsmenn Heilbrigðisstofnun Suðurlands hefur verið ákveðið að ágóðinn af uppboðinu renni til umbóta og fegrunar nýrrar göngudeildar krabbameins- og gigtarsjúklinga.