Hvítárbrú formlega opnuð

Bræðratunguvegur og ný brú yfir Hvítá var formlega opnuð í dag er Ögmundur Jónasson innanríkisráðherra ásamt Hreini Haraldssyni vegamálastjóra klippti á borða.

Nýja leiðin styttir vegalengdina á milli Flúða og Reykholts um 20 km. Heildarvegalengd nýs Bræðratunguvegar er um 7,5 km, frá Hrunamannavegi um Hvítá að Biskupstungnabraut.

Ný brú á Hvítá er 270 m að lengd. Tvær akbrautir eru á brúnni og er samanlögð breidd þeirra 9 m, auk þess sem 2 m breið göngu-/reiðleið er á brúnni.

Áætlaður heildarkostnaður vegna verksins er 1.140 m. kr., að sögn Vegagerðarinnar.