Laugardaginn 4. apríl verður haldinn handverksmarkaður í versluninni Emil&Lína í Austurgarði á Selfossi.
Þetta er í annað sinn sem verslunin heldur markað af þessu tagi en óhætt að segja að uppátækið hafi heppnast einstaklega vel í fyrra skiptið.
„Viðtökurnar við síðasta markaði voru þannig að við vissum að við yrðum að endurtaka leikinn. Nú er komið að því og við höldum annan handverksmarkað í verslun okkar við Larsenstræti um páskahelgina,“ segir Jóna Alla Axelsdóttir, starfsmaður hjá Emil&Lína, í samtali við sunnlenska.is.
„Á markaðnum verður hægt að versla allskonar fallegt handverk frá listamönnum af Árborgarsvæðinu og við hvetjum fólk til að koma og styðja við bakið á þessu frábæra fólki. Lionsklúbburinn Embla mun svo sjá um að baka vöfflur á staðnum en það verður fjáröflun fyrir styrktarsjóðinn þeirra.“
„Seljendur á markaðnum verða Daley kerti, Endurlífga Jewellery og Silfurjón, Artrún, UgluÍris og Born in Iceland. Einnig verður páskaeggjaleit í gangi á sama tíma þar sem þeir krakkar sem finna egg fá litla gjöf frá Emil&Lína. Heitt á könnunni eins og alltaf og almennt góð páskastemning,“ segir Jóna Alla ennfremur.
Markaðurinn stendur frá klukkan 12 til 16 og er sem fyrr segir í verslun Emil&Lína í Austurgarði, við Larsenstræti á Selfossi.
Facebook-viðburðurinn fyrir markaðinn.
