Úrslitakeppni stærðfræðikeppninnar Pangeu fór fram með pompi og prakt í Menntaskólanum í Hamrahlíð síðastliðinn laugardag. Tveir Hvergerðingar náðu góðum árangri í úrslitakeppninni.
Sigurður Elí Vignisson varð í 9. sæti í keppni 9. bekkjar og Hlynur Kári Hlynsson varð í 18. sæti, einnig í 9. bekk. Eitthundrað nemendur frá 62 skólum víða um land komust í úrslit keppninnar.
Af Suðurlandi var Grunnskólinn í Hveragerði eini skólinn sem sem átti nemendur í úrslitum. Nemendur frá Grunnskólanum á Hellu, Barnaskólarnum á Eyrarbakka og Stokkseyri og Stekkjaskóla á Selfossi tóku einnig þátt í undankeppninni.
Keppnin, sem var fyrst haldin á Íslandi fyrir 10 árum, er fyrir grunnskólakrakka í 8. og 9. bekk af landinu öllu. Fjöldi þátttakenda í ár var 4.694 og því er keppnin sú
langstærsta sinnar tegundar á landinu.
Í 8. bekk var það Kormákur Jónas Níelsson úr Hagaskóla sem fór með sigur af hólmi og í 9. bekk sigraði Stefán Dagur Pálmason úr Kópavogsskóla.
Efla verkfræðistofa, CCP og Reykjavíkurborg voru styrktaraðilar keppninnar í ár en hún er að öðru leyti haldin í sjálfboðaliðastarfi af Félagi Horizon í samstarfi við stærðfræðinema við Háskóla Íslands. Félag Horizon eru félagasamtök sem vilja efla þátttöku og inngilidingu innflytjenda og flóttamanna á Íslandi með skipulagningu viðburða sem koma á samtali þvert á menningarheima.
