Hvalshræið sem rak upp að landi við Stokkseyri í vikunni er nú komið alveg upp í fjöru og liggur fyrir neðan sjóvarnargarðinn við kirkjuna.
Björgunarsveitarmenn fóru á báti að hvalnum úti fyrir Stokkseyri fyrr í vikunni og tóku sýni úr honum. Um hnúfubak er að ræða.
Starfsmenn Hafrannsóknarstofnunar munu að öllum líkindum skoða hræið en það er á ábyrgð sveitarfélagsins að fjarlægja hræið eða grafa það í fjörunni.
Að sögn Björns Inga Bjarnasonar, fréttaritara sunnlenska.is við ströndina, ilmar hræið nokkuð hressilega. Búast má við að margir munu leggja leið sína á Stokkseyri um helgina til að skoða skepnuna.
Þórður Guðmundsson, Jónas Henningsson og Jón Jónsson skoða hræið í morgun. sunnlenska.is/Björn Ingi Bjarnason