Seint í gærkvöldi varð bílslys við Lómagnúp í Skaftárhreppi þar sem húsbíll valt. Mikill vindur var á svæðinu þegar slysið varð.
Sex einstaklingar voru í bílnum og urðu einhver slys á fólki, þó ekki alvarleg.
Í dagbók lögreglunnar á Suðurlandi kemur fram að þrjú önnur umferðarslys voru skráð um helgina.
Tveir árekstrar urðu við Skíðaskálabrekkuna í Hveradölum sem ollu miklum umferðartöfum, en færð á svæðinu var slæm. Tvær hópbifreiðar fóru út af veginum á sama svæði án þess að slys yrðu á fólki.
Þá fór önnur hópbifreið út af Þingvallavegi í gær og þurfti aðstoð björgunarsveita, Brunavarna Árnessýslu og Slökkviliðs höfuðborgarsvæðisins til að koma fólki út úr bifreiðinni. Alls voru tólf manns í rútunni en engin slys voru á fólki. Loka þurfti bæði Hellisheiði og Þingvallavegi um tíma á meðan björgunarstarf stóð yfir.