HSU hlaut styrki fyrir tvö nýsköpunarverkefni

Heilbrigðisstofnun Suðurlands á Selfossi. sunnlenska.is/Helga R. Einarsdóttir

Tólf verkefni fengu fjármögnun úr fjárfestingarátaki um nýsköpun í heilbrigðisþjónustu sem fjármála- og efnahagsráðuneytið, heilbrigðisráðuneytið og atvinnuvega- og nýsköpunarráðuneytið stóðu fyrir.

Mikill áhugi var á framtakinu og alls bárust 48 umsóknir og í þessari úthlutun fékk Heilbrigðisstofnun Suðurlands styrk fyrir tveimur verkefnum sem stofnunin tengist.

Annað verkefnið snýr að þróun hugbúnaðar vegna meðhöndlunar nýrnasjúklinga. Styrkveitingin nam 15 milljónum króna og er markmið verkefnisins að auka gæði og öryggi meðferðar nýrnasjúklinga. Þetta verkefni snýr einnig að fjarlækningum en með aukinni rafrænni samvinnu heilbrigðisstarfsfólks og sjúklings er hægt að bjóða upp á skilvirka og hagkvæma þjónustu sem eykur aðgengi sjúklinga að þjónustu, sérstaklega úti á landi. Verkefnið er unnið í samvinnu við Kolibri ehf.

Hitt verkefnið snýr að augnlækningum í Vestmannaeyjum en í þessu átaki verður byggð upp  þjónusta í gegnum fjarbúnað.  Styrkveitingin nam tæpum 10 milljónum króna. Markmið verkefnisins er að nútímavæða augnlæknaþjónustu á landsbyggðinni með nýrri nálgun og lausnum í fjarþjónustu og fullbúnum tækjabúnaði. Áhersla er lögð á gæði, öryggi og bætt aðgengi að augnlæknaþjónustu á landsbyggðinni. Verkefnið verður unnið í samvinnu við Sjónlag hf.

Heildarfjárfesting ríkisins í þessari úthlutun nemur um 148 milljónum króna en markmið átaksins var að auka nýsköpun með þarfir heilbrigðisþjónustu að leiðarljósi og fjölga á sama tíma störfum.