Í vikunni undirritaði Heilbrigðisstofnun Suðurlands samninga við Rangárþing ytra annars vegar, og Flóahrepp hins vegar, um trúnaðarlæknis- og heilbrigðisþjónustu af hálfu HSu fyrir starfsmenn sveitarfélaganna.
Herdís Gunnarsdótir, forstjóri, undirritaði samningana fyrir hönd HSu en sveitarstjórarnir Ágúst Sigurðsson, fyrir hönd Rangárþings ytra og Eydís Þ. Indriðadóttir, fyrir hönd Flóahrepps.
Samningarnir fela í sér samkomulag um þjónustu HSu fyrir heilsuvernd starfsmanna sveitarfélaganna og aðgengi þeirra að heilbrigðisstarfsmönnum HSu. Að jafnaði starfa um 135 starfsmenn hjá Rangárþingi ytra og um 45 hjá Flóahreppi, sem geta nú nýtt sér árlega heilsufarsskoðun hjá HSu.
Markmið samningsins er að minka líkur á atvinnutengdum sjúkdómum og slysum starfsmanna. Jafnframt verður veitt fræðsla til vinnuveitanda og starfsmanna á lífstílstengdum áhættuþáttum og varnir gegn þeim auk greiningar á aðstæðum á hverjum vinnustað til þess að draga úr fjarvistum sökum veikinda, sjúkdóma og slysa. Stefnt er að því að auka starfsánægju starfsmann á vinnustað og stuðla að vellíðan í starfi. Starfsmenn geta leitað til hjúkrunarfræðings og trúnaðarlæknis á heilsugæslu HSu.
Reynslan hefur þegar sýnt að slíkir samningar hafa dregið úr starfsmannveltu og vísbendingar eru um að samstarf sem þetta hafi stuðlað að því fyrirbyggja sjúkdóma og koma í veg fyrir alvarlega afleiðingar einkenna sjúkdóma á byrjunarstigi. Þjónusta sem starfsmönnum býðst í kjölfar samningsins er auk árlegrar heilsufarsskoðunar, ýmsar mælingar, viðtöl, bólusetningar og fræðsla um slysavarnir, svefnvandamál, hreyfingu og önnur heilbrigðismálefni.