Heilbrigðisstofnun Suðurlands starfar ekki á neyðarstigi um helgina, eins og starfsmenn stofnunarinnar greindu frá á Facebook í gær.
„Staðan á bráðamóttöku HSU er þannig að erfiðlega hefur reynst að fullmanna læknavakt helgarinnar, en hins vegar hefur mönnun hjúkrunarfræðinga gengið vel. Þessi staða getur haft áhrif á biðtíma eftir læknisþjónustu og biðjum við skjólstæðinga okkar um að sýna því skilning,“ segir Díana Óskarsdóttir, forstjóri HSU.
Bráðamóttaka HSU sinnir eins og venjulega alvarlegum veikindum og slysum. Erindum er forgangsraðað eftir alvarleika og þeim sem ekki þurfa þjónustu bráðamóttöku er vísað í önnur úrræði.
Að sögn Díönu hefur starfsemin gengið vel um helgina þökk sé starfsfólkinu, sem á hrós skilið fyrir.