Sveitarstjórn Hrunamannahrepps mótmælir harðlega fyrirhugaðri hækkun virðisaukaskatts á aðgang að baðlónum úr 11% í 24% og skorar á stjórnvöld að falla frá áformunum.
Í bókun sveitarstjórnar er minnt á að í Árnessýslu er fjöldi baðlóna eins og á landinu öllu, allt vinsælir áfangastaðir sem hafa borið hróður landsins víða. Í Hrunamannahreppi eru þrjú baðlón, Gamla laugin, Hrunalaug og í Kerlingarfjöllum, allt þekktir áfangastaðir sem hafa mikla þýðingu fyrir atvinnulíf og ferðaþjónustu á svæðinu. Aðdráttarafl þeirra styður við störf, eflir aðra þjónustu og skapar verðmæti í nærsamfélaginu. Mikilvægi þeirra nær því langt út fyrir eigin rekstur.
„Að mati sveitarstjórnar er hætta á að fyrirhuguð skattahækkun leiði til hærra aðgangsverðs, dragi úr eftirspurn og að það muni þrengja að rekstri þessara fyrirtækja. Slík þróun getur haft neikvæð áhrif á gistingu, veitingarekstur og aðra þjónustu á svæðinu. Hækkunin myndi því vinna gegn markmiðum um öflugt atvinnulíf á landsbyggðinni og dreifingu ferðamanna og tekna af ferðaþjónustu um landið allt,“ segir í bókuninni.
Sveitarstjórn Hrunamannahrepps leggur áherslu á að fyrirtæki búi við stöðugt og fyrirsjáanlegt rekstrarumhverfi. Hún hvetur stjórnvöld til að eiga raunverulegt samráð við rekstraraðila og sveitarfélög og taka mið af þeirri gagnrýni sem komið hefur fram um áhrif skattbreytinganna á atvinnu, byggðaþróun og samkeppnishæfni. Sveitarstjórn ítrekar að lokum þá kröfu sína um að fallið verði frá fyrirhugaðri hækkun virðisaukaskatts á baðlón.