Hringvegurinn er lífæðin

Það er skýlaus krafa sveitarfélaga beggja vegna Múlakvíslar að þjóðvegur 1 við Múlakvísl verði orðinn opinn allri umferð fyrir næstu helgi.

Mýrdalshreppur og Skaftárhreppur hafa sent frá sér eftirfarandi tilkynningu þar sem skorað er á yfirvöld að ráðast nú þegar í úrbætur.

“Í ljósi þeirra miklu áfalla sem dunið hafa yfir samfélögin á undanförnum mánuðum af völdum náttúruhamfara, nú síðast hlaupið í Múlakvísl sem lokar hringveginum um óákveðin tíma, skora sveitarstjórnirnar á samgönguyfirvöld að ráðast nú þegar í úrbætur svo vegurinn verði opnaður eða bílar ferjaðir yfir á allra næstu dögum. Slíkt var gert fyrir 50 árum og hlýtur að vera mögulegt með nútíma tækjakosti á 21. öldinni.

Lokun sem þessi hefur víðtæk áhrif á samfélagið allt og ekki síst ferðaþjónustuna sem byggir ársafkomu sína að miklu leiti á þeim vikum sem framundan eru.

Nú þegar hefur ferðaþjónustan og störf tengd henni skaðast mikið.

Hringvegurinn er lífæð þessara sveitarfélaga og í ljósi þeirra náttúruhamfara sem dunið hafa yfir samfélögin síðustu mánuði, er ljóst að til viðbótar við það, er hrun ferðaþjónustunnar algjört.

Þá er öryggi íbúa einnig ógnað þar sem sjúkrabílar á svæðinu eru ekki þannig útbúnir að þeir geti flutt sjúklinga yfir Fjallabaksleið. Þyrla þyrfti skilyrðislaust að vera til staðar á svæðinu á meðan vegasamband er rofið.”