Gosmökkur stendur upp frá gígnum í Eyjafjallajökli til suðvesturs upp í 4 km hæð, gjóskufall er lítið og ekki hefur frést af öskufalli á láglendi.
Nyrðri gígurinn er ennþá virkur. Þar er væg sprengivirkni með hraunslettum sem fara u.þ.b. 100 m í loft upp. Norðan gígs hefur bráðnað u.þ.b. 300 m löng geil og upp úr henni standa gufumekkir, einkum frá jöðrum. Þar er hraun að renna og stíga mekkirnir af þar sem hraunið snertir jökulísinn. Gosórói er svipaður og undanfarna daga og engin merki eru um að gosi sé að ljúka.
Hraunstreymi hefur að öllum líkindum hafist nærri hádegi sl. miðvikudag. Tímasetningin er byggð á því að þá hófst nokkuð samfellt vatnsrennsli niður Gígjökul. Engin merki eru um bráðnun eða vatnsrennsli til suðurs.