HR smíði ehf í Reykholti í Bláskógabyggð átti lægsta tilboðið í byggingu nýrrar björgunarmiðstöðvar við Þinggerði 1 á Borg í Grímsnesi, sem Grímsnes- og Grafningshreppur bauð út á dögunum.
Tilboð HR smíði hljóðaði upp á tæplega 221 milljón króna og var 1,6% yfir kostnaðaráætlun verksins, sem er tæpar 217,4 milljónir króna.
Fimmtán önnur tilboð bárust í verkið. Tré og straumur ehf. og Gæðabygg buðu 230,0 milljónir króna, Fylkir ehf. 232,4 milljónir, Iðjuverk 232,6 milljónir, SHP consulting ehf. 238,4 milljónir, Atlas Verktakar ehf. 274,8 milljónir, Byggingarfélagið Hvati 276,1 milljónir, K16 ehf. 283,6 milljónir, Þelamörk 291,4 milljónir, Húsameistari ehf. 298,5 milljónir, Sjammi ehf. 304,7 milljónir, Alefli ehf. 306,7 milljónir, Dóttir og son 309,7 milljónir, Mannverk 340,0 milljónir og E. Sigurðsson 362,8 milljónir króna. Að auki barst tilboð frá Múr og Málningarþjónustunni Höfn í tölvupósti að upphæð 296,1 milljónir króna.
Björgunarmiðstöðin er 1.135 fermetrar með millilofti, límtréshús með steinullarfylltum samlokueiningum.
Áætluð verklok eru 20. desember næstkomandi.
