Hræddir og hraktir sóttir á Heklu

Björgunarsveitir Slysavarnafélagsins Landsbjargar á Suðurlandi eru núna á sjöunda tímanum að koma til byggða með tvo ferðamenn sem leitað hefur verið að á Heklu síðustu klukkustundirnar.

Ferðamennirnir hringdu á Neyðarlínuna um miðjan dag og sögðust villtir í þoku á Heklu.

Björgunarsveitarmenn frá Suðurlandi ásamt hálendisvakt björgunarsveita héldu á staðinn og fundu ferðamennina eftir skamma leit. Voru þeir hræddir, kaldir og hraktir en gengu sjálfir niður í fylgd björgunarmanna.