Hópslysaáætlun Almannavarna var virkjuð eftir árekstur smárútu og fólksbíls á Biskupstungnabraut, skammt fyrir ofan Hjarðarland, um klukkan hálf þrjú í dag.
Ein þyrla Landhelgisgæslunnar var kölluð á vettvang og önnur sett í viðbragðsstöðu vegna slyssins. Fjölmennt lið lögreglu og sjúkraflutninga HSU ásamt tækjabílum frá Brunavörnum Árnessýslu fóru á vettvang slyssins.
Tveir verða fluttir með þyrlu á sjúkrahús í Reykjavík og átta til skoðunar á slysadeild HSU á Selfossi. Upplýsingar um líðan fólksins liggja ekki fyrir.
Lögreglan á Suðurlandi rannsakar tildrög slyssins og er Biskupstungnabraut lokuð á meðan viðbragðsaðilar vinna á vettvangi en hjáleið er um Reykjaveg.