Í maí var haldinn opinn kynningarfundur um mögulega opnun Hopp leigubílaþjónustu í uppsveitum Árnessýslu. Fundurinn var afar vel sóttur og sköpuðust líflegar og jákvæðar umræður um framtíð samgangna á svæðinu.
Á fundinum kynntu Kristín Hrefna Halldórsdóttir, framkvæmdastjóri Hopp, og Eyþór Máni, sérfræðingur á sviði leigubíla hjá fyrirtækinu, hvernig Hopp getur stutt við samfélagið, ferðaþjónustuna og aukið aðgengi að öruggum og nútímalegum samgöngum í Uppsveitunum.
Undanfarin ár hefur eftirspurn eftir leigubílaþjónustu á svæðinu aukist verulega samhliða ört vaxandi ferðaþjónustu og fjölbreyttari afþreyingu. Fjöldi ferðamanna dvelur í sumarhúsum, gististöðum og hótelum víðs vegar um Uppsveitirnar og kalla bæði gestir og heimamenn eftir betri samgöngumöguleikum.
Finna fyrir aukinni eftirspurn
„Við finnum greinilega fyrir aukinni eftirspurn eftir leigubílum, sérstaklega í tengslum við viðburði og heimsóknir í Vínstofu Friðheima. Þar sem við erum með vínveitingaleyfi er mikilvægt að þeir gestir sem velja sér að fá sér áfengan drykk hafi örugga leið til og frá staðnum,“ segir Knútur Rafn Ármann, eigandi og framkvæmdastjóri Friðheima.
Svipaða sögu er að segja frá Laugarási þar sem nýtt og glæsilegt lón ásamt háklassa veitingastað hefur vakið mikla athygli bæði innlendra og erlendra gesta.
„Við fáum reglulega fyrirspurnir frá viðskiptavinum um leigubíla til og frá gististöðum í uppsveitunum en þjónustan hefur einfaldlega ekki verið til staðar hingað til. Gestir okkar dvelja víða á svæðinu, meðal annars í Reykholti, á Flúðum, og við Geysi og þörfin fyrir fjölbreyttari samgöngur er orðin mjög skýr,“ segir Bryndís Björnsdóttir, framkvæmdastjóri Laugarás Lagoon.
Þurfa að minnsta kosti þrjá bílstjóra
Með tilkomu Hopp skapast atvinnu- og rekstrartækifæri fyrir einstaklinga á svæðinu en samkvæmt upplýsingum frá fyrirtækinu er nauðsynlegt að þrír eða fleiri leigubílstjórar séu komnir í ferli fyrir réttindi, svo hægt sé að halda áfram með verkefnið og kynna hvenær hægt sé að setja þjónustuna í gang.