Hnitaskrár af gufulögnum á Hengilssvæðinu

Orka náttúrunnar (ON) hefur nú gefið út hnitaskrár fyrir GPS-tæki af öllum gufu- og heitavatnslögnum á Hengilssvæðinu.

Þetta er gert til að efla öryggi útivistarfólks, einkum þeirra sem ferðast um heiðina á vélsleðum eða jeppum að vetrarlagi.

ON leggur áherslu á að fólk geti nýtt virkjanasvæði fyrirtækisins á Nesjavöllum og Hellisheiði til útivistar með öruggum hætti. Um svæðin liggja gufulagnir frá borholum og nú nýverið var jarðhitasvæðið við Hverahlíð tengt Hellisheiðarvirkjun með gufulögn. Lagnirnar geta verið varasamar, einkum í miklum snjó, því það geta myndast holrúm í snjónum í kringum þær. Þess hefur orðið vart öðru hvoru síðustu ár að farartæki hafi rekist utan í lagnirnar.

Viðvörunarskilti hafa verið sett upp sem vara við hættunni og nú hafa verið útbúnar hnitaskrár sem útivistarfólk getur hlaðið inn í staðsetningartækin sín. Þá koma allar gufulagnir á Hengilssvæðinu fram á uppdráttunum í tækjunum sem og heitavatnslögnin frá Nesjavöllum í bæinn. Þær yfirkeyrslur sem útbúnar hafa verið fyrir ferðafólk eru hnitsettar í skránum. Skrárnar eru tvær, fyrir mismunandi útgáfur staðsetningartækja.

ON vill benda útivistarfólki á að skrárnar eru gögn til að styðjast við á ferðum sínum, í þeim geta leynst gloppur eða villur og fólk ferðast á eigin ábyrgð um virkjanasvæðin.

Smelltu hér til að sækja hnitaskrár af gufulögnum á Hengilssvæðinu og leiðbeiningar um notkun skránna.