Matthildur Ásmundardóttir bæjarstjóri Sveitarfélagsins Hornafjarðar skrifaði undir leigusamning um Stekkaklett við Hlyn Pálmason í dag.
Í tilkynningu frá sveitarfélaginu segir að metnaðarfull áform Hlyns um að byggja upp skapandi miðstöð lista og kvikmynda með undirbúnings- og eftirvinnslustúdíói hafi alla burði til að styrkja atvinnu- og menningarlíf í sveitarfélaginu auk þeirra námstækifæra sem verkefnið býður uppá fyrir íbúa sveitarfélagsins.
Í október 2018 var auglýst eftir tillögum um nýtingu og framtíðaráform fyrir Stekkaklett þar sem óskað var eftir aðilum sem kynnu að hafa áhuga á uppbyggingu og starfsemi á lóðinni. Tillaga Hlyns Pálmasonar var valin þar sem hún þótti uppfylla allar kröfur auglýsingarinnar og þótti fela í sér nýnæmi og menningartengsl fyrir samfélagið.
Öllum íbúum boðið í bíó
Í tilkynningu sveitarfélagsins segir að undirskrift samningsins á sama tíma og kvikmyndin „Hvítur hvítur dagur“ er forsýnd á heimavelli sé mjög ánægjuleg enda tengist hún Stekkakletti svo sterkt. Myndin hefur hlotið mikla velgengni um heim allan og samhliða hefur Hlynur öðlast virðingu sem einn af hæfileikaríkustu ungu listamönnum Skandinavíu. Mun það án efa styrkja verkefnið við Stekkaklett. „Hvítur hvítur dagur“ verður forsýnd á Hornafirði á sunnudag þangað sem öllum íbúum sveitarfélagsins er boðið.