Fimm sunnlensk sveitarfélög raða sér í efstu sætin yfir þau sveitarfélög á Íslandi sem eru með hæst hlutfall erlendra ríkisborgara. Mýrdalshreppur er eina sveitarfélagið á Íslandi þar sem erlendir ríkisborgarar eru fleiri en íslenskir.
Alls eru 67,4% íbúa Mýrdalshrepps með erlent ríkisfang, 760 erlendir ríkisborgarar af alls 1.128 íbúum hreppsins. Næst hæsta hlutfall erlendra ríkisborgara er í Skaftárhreppi með 46,2% og Bláskógabyggð með 39,1% íbúa.
Þar á eftir koma Hrunamannahreppur með 36,4% og Ásahreppur með 35,2%. Rangárþing eystra er í tíunda sæti á listanum með 33,2%.
Alls eru 21,2% íbúa á Suðurlandi með erlent ríkisfang og hefur hlutfallið hækkað um 0,8% á milli ára. Tölurnar miðast við 1. desember 2025. Hlutfall erlendra ríkisborgara á landinu öllu er afar breytilegt milli sveitarfélaga eða frá rúmum 67,4% niður í 5,8% þó að jafnaði er hlutfallið um 20,4% þegar horft er til allra sveitarfélaga.
Þessar tölur eru byggðar á skráningu Þjóðskrár á fjölda einstaklinga sem eru skráðir með búsetu hér á landi eftir ríkisfangi.