Hluta húsnæðis Flóaskóla í Flóahreppi hefur verið lokað eftir að grunur kom upp um myglu í starfsmannaaðstöðu og skólaseli.
Gunnlaug Hartmannsdóttir, skólastjóri, segir í samtali við Morgunblaðið að brugðist hafi verið við fyrir jól þegar veikinda fór að gæta meðal starfsfólks.
„Það hafa þrír starfsmenn veikst. Tveir þeirra hafa áður verið í aðstæðum þar sem mygla hefur komið upp. Það þykir óvenju hátt hlutfall meðal þrjátíu starfsmanna að þrír veikist,“ segir Gunnlaug en tveir starfsmannanna eru enn frá vinnu vegna þessa. Engin veikindi hafa komið upp meðal nemenda í skólanum.
Aðspurð segir hún að þeim hluta húsnæðisins þar sem mygla fannst hafi verið lokað meðan unnið sé að því að finna lausn. „Við þrengdum bara að okkur og komum allri starfsemi fyrir innan þess rýmis sem við höfum. Það eru allir sem einn að vinna að því að leysa hlutina.“