Ingólfshvoll hestamiðstöð, sem á og rekur reiðhöllina á Ingólfshvoli í Ölfusi, og forsvarsmenn HorseDay undirrituðu nýverið samning sín á milli. Samningurinn felur meðal annars í sér að HorseDay verður helsti styrktaraðili starfsemi reiðhallarinnar til næstu þriggja ára, ásamt því að reiðhöllin á Ingólfshvoli verður hér eftir nefnd HorseDay-höllin á Ingólfshvoli.
„Á Ingólfshvoli er rekin metnaðarfull starfsemi af kraftmiklu hestafólki sem kemur víðsvegar af landinu. Þegar hafa verið gerðir samningar um margháttaða starfsemi í nýju Horseday-höllinni fyrir árið 2023, en þar má einna helst nefna mótaröð Meistaradeildar í hestaíþróttum sem mun fara þar fram að mestu leyti. Við erum spennt fyrir samstarfinu og hlökkum til að bjóða fólk velkomið í HorseDay-höllina á Ingólfshvoli,“ segir Oddur Ólafsson, framkvæmdastjóri HorseDay.
Stuðlar að framförum í hestamennsku
HorseDay kom á markað í sumar með samnefnt smáforrit, sem er innlegg í stafræna vegferð hestahaldsins og á að stuðla að framförum í hestamennsku, með bættri yfirsýn og skilvirkari samskiptum hestafólks sín á milli. Lausnir á borð við HorseDay hafa rutt sér til rúms í flestum íþróttagreinum víðs vegar í heimi hestaíþróttarinnar og nú er hestamennskan á fyrstu skrefum í notkun kerfisins hér á landi.
Að sögn Teits Árnasonar, meðeiganda Ingólfshvols hestamiðstöðvar, er sérlega áhugavert fyrir Ingólfshvol að vinna vinna með HorseDay að markaðs- og kynningarmálum.
„HorseDay er að koma öflugt inn í hestaheiminn, þarna er á ferðinni metnaðarfullt og spennandi verkefni sem á örugglega eftir að leiða af sér góða hluti fyrir iðkendur hestamennskunnar,“ segir Teitur.