Nokkur skjálftavirkni var í Mýrdalsjökli í gærkvöldi og nótt. Við eftirlitsflug vísindamanna í gærkvöldi kom í ljós að nýr sigketill hefur myndast í norðurhlíðum Hábungu.
Tíðnigreining óróa á Rjúpnafelli frá kl. 14–16 í gær sýnir að um hlaupóróa er að ræða. Leiðni í Múlakvísl er há og rennsli er mikið. Um kl. 17 komu upplýsingar frá starfsmönnum við mælingar í Múlakvísl um að áin væri óvenju gruggug.
Vísindamenn sem flugu yfir Mýrdalsjökul um kl. 19 í kvöld sáu að ketill hafði myndast á nýjum stað, í norðurhlíðum Hábungu, en hann er ekki stór.
Vatnamælar voru settir upp í Múlakvísl á árunum 1999–2000, við þjóðveg á Mýrdalssandi og við Léreftshöfuð. Þeir eru hluti vöktunarkerfis Mýrdalsjökuls, en með þessum mælum er hægt að fylgjast með óeðlilegum breytingum í leiðni og vatnsrennsli í þekktum farvegum jökulhlaupa frá jöklinum. Ekki er búist við stóru hlaupi nú.
Tólf jarðskjálftar mældust í Mýrdalsjökli frá kl. 22 í gærkvöldi og fram undir morgun, sá stærsti 2,1 á Richter.