Hlaðvarpið Fræddu mig fór í loftið í sumar en umsjónarmenn þáttanna eru Selfyssingarnir Diljá Böðvarsdóttir og Dagný Freyja Guðmundsdóttir.
„Hugmyndin að hlaðvarpinu kom oft upp í spjalli. Við eigum það sameiginlegt að það er fátt sem við getum ekki spjallað um eða haft skoðun á. Við erum báðar mjög forvitnar og eigum auðvelt með að finna hlægilegu hliðina á flestum málefnum. Við vorum farnar að eyða vinkonukvöldum í að hugsa um umræðuefni sem væri gaman að ræða áður en við slógum til og fórum í hlaðvarpsverkefnið af fullum krafti!“ segir Diljá í samtali við sunnlenska.is.
Dagný segir að hlaðvarpið byggist á að þær fræði hvor aðra og hlustendur í leiðinni um eitthvað málefni sem er fyrirfram ákveðið áður en þær taka upp.
„Við veljum algjörlega um hvað við fjöllum, svo lengi sem það tengist viðfangsefni þáttarins. Áherslusvið okkar eru mismunandi – en ég legg meiri áherslu á umfjöllun sem tengist nútímanum og poppkúltúr, en Diljá fjallar frekar um eitthvað sem tengist mannkynssögunni, þjóðtrú eða jafnvel bókmenntum,“ segir Dagný.
Fjölbreytt viðfangsefni
Fyrsti þátturinn kom út 6. júlí síðastliðinn. „Það var kynningarþátturinn okkar þar sem við leyfum hlustendum einfaldlega að kynnast okkur betur. Fyrsti þátturinn með umræðuefni kom síðan út 10. júlí,“ segir Diljá en þess má geta að nýr þáttur kemur út annan hvern þriðjudag.
„Hingað til höfum við tekið flesta þættina upp í stofunni heima hjá Diljá, en við höfum líka afnot af upptökustúdíói sem við höfum nýtt okkur nokkrum sinnum. Upptökurnar hafa gengið nokkuð vel, en við búum svo vel að maðurinn hennar Diljár er upptökumaður og kann á allar græjur, og er hálfgerður gæðaeftirlitsstjóri þáttanna. Fyrstu þættina sá hann um að stilla öllu upp og svona, og svo hefur Diljá verið að fikra sig áfram í upptökunum. Það hefur ekki gengið alveg hnökralaust en þetta kemur allt með æfingunni!,“ segir Dagný.
Þær stöllur hafa fengið góðar viðtökur við þáttunum. „Það er mjög skemmtilegt að lenda á spjalli við fólk sem hefur hlustað á þættina og það hefur yfirleitt einhverjar skemmtilegar pælingar og skoðanir á umræðuefnunum,“ segir Diljá.
„Við byrjum alla þætti á slagorðinu okkar sem er „hlaðvarp forvitna fólksins“. Það mætti því segja að þættirnir séu einfaldlega fyrir alla sem eru fróðleiksfúsir um fjölbreytt viðfangsefni. Hvort sem áhugasvið hlustenda er fræga fólkið og Hollywood eða mannkynssaga og bókmenntir, þá geta allir hlustendur, ungir sem aldnir, fundið eitthvað sem vekur áhuga þeirra,“ segir Diljá.
Samstíga vinkonur
Diljá er uppalin á Selfossi og er íslenskufræðingur að mennt. Að eigin sögn hefur hún alla tíð haft mikinn áhuga á íslensku og tungumálum almennt. „Ég hef einnig mikinn áhuga á þjóðtrú og menningu, bæði íslenskri og erlendri,“ segir Diljá sem býr á Selfossi ásamt manninum sínum og hundinum Loka.
Dagný er að austan, nánar tiltekið frá Fáskrúðsfirði, og hefur verið í grunnskólum víðsvegar um landið. „Það hefur sennilega hjálpað mér mikið þegar kemur að því að geta spjallað við alla um allt og ekki neitt,“ segir Dagný sem býr líka á Selfossi ásamt syni sínum og kisunni Slaufu.
„Samstarfið gengur svo vel, við erum mjög samstíga og það er eiginlega aldrei leiðinlegt hjá okkur, við erum sammála um að það sé sterkur grunnur að góðu samstarfi. Við erum góðar vinkonur, samskiptin okkar á milli eru jákvæð og alltaf stutt í grínið. Það er svo sannarlega mjög dýrmætt að eiga þetta sameiginlega hobby sem okkur þykir svo vænt um,“ segir Dagný.
„Hægt er að finna hlaðvarpið Fræddu mig á öllum helstu hlaðvarpsveitum. Svo hvetjum við auðvitað fólk til þess að fylgja okkur á Instagram, en við erum þar undir nafninu @fraeddumig . Á Instagram setjum við reglulega inn efni, það er myndir og annað, sem tengist þáttunum,“ segir Diljá að lokum.
