Síðdegis í dag voru björgunarsveitir í Hveragerði, Þorlákshöfn, Eyrarbakka og Selfossi kallaðar út vegna foktjóns á nokkrum stöðum. Einn innhringjanda til Neyðarlínu lá sjálfur á þakplötu sem hafði losnað til að forða því að hún ylli tjóni.
Á Litla-Saurbæ í Ölfusi var þak á gamalli hlöðu við það að fjúka og var byrjað á því að koma að vörubíl með krabba í krana til að styðja við þakið og fergja það niður.
Til stóð að rífa húsið og var verktakinn mættur á svæðið með tæki til þess en vinna var ekki hafin. Ljóst var að byggingin myndi ekki standa mikið lengur og að skynsamlegt væri að ljúka niðurrifi. Sú ákvörðun var tekin með ábúanda og gengið í það að fella hlöðuna. Þar var til aðstoðar verktakinn og þau tæki sem hann hafði þegar komið með á svæðið.
Þá losnuðu þakplötur á húsi á Stokkseyri og á hesthúsi á Eyrarbakka auk þess sem þakplötur á nýlegu íbúðarhúsi í Ölfusinu voru farnar að losna en það tókst að festa þær niður á ný.
Eftir að björgunarstörfum var lokið óku björgunarsveitir um byggðarlögin til eftirlits, áður en haldið var aftur í bækistöðvar.
