Hjólreiðamaður missti stjórn á hjóli sínu og féll í götuna á Hvolsvelli á mánudaginn í síðustu viku.
Maðurinn var hjálmlaus og er talið að hann hafi nef- og höfuðkúpubrotnað. Hann var fluttur á sjúkrahús til aðhlynningar.
Í dagbók lögreglunnar á Suðurlandi kemur fram að þrettán önnur umferðarslys hafi verið tilkynnt til lögreglu í síðustu viku.
Ökumaður og farþegi sluppu ómeiddir þegar bíll valt útaf Meðallandsvegi í gær og fór heila veltu.
Í tveimur tilvikum rákust hliðarspeglar ökutækja saman við mætingu en í hvorugu tilvikinu urðu slys á fólki.
Í dagbókinni kemur einnig fram að 57 ökumenn hefðu verið kærðir fyrir að aka of hratt í umdæminu í vikunni og tveir fyrir að aka undir áhrifum fíkniefna.