Hjálmlaus á vespu með tvo farþega

Í liðinni viku voru nítján ökumenn kærðir fyrir að aka of hratt í umdæmi lögreglunnar á Selfossi. Flestir þeirra voru á þjóðvegum utan þéttbýlis en inn á milli leyndust ökumenn sem óku of hratt í þéttbýli.

Þar sáust tölur eins og 83 km/klst á 50 km/klst kafla og er þá rétt að rifja upp að nú eru margir að spreyta sig gangandi til og frá skóla í fyrsta sinn og því mikilvægt að allir taki höndum saman og gæti að sér að fylgja umferðarreglum.

Borist hafa ábendingar til lögreglu að undanförnu um akstur á vespum og rafvespum um götur á Selfossi og í Hveragerði þar sem ökumaður er ekki með hjálm og jafnvel með einn eða tvo farþega með í för.

Lögreglan brýnir fyrir foreldrum að láta slíkt ekki viðgangast og neita börnum sínum um leyfi til að nota þessi tæki ef reglum um notkun þeirra er ekki fylgt.