Hitafundur í Friðheimum: „Aldrei sátt um þessa útfærslu“

Sandra Sigurðardóttir var eini þingmaður ríkisstjórnarinnar úr Suðurkjördæmi sem mætti á fundinn. Ljósmynd/Aðsend

Í gærkvöldi var haldinn fundur í Friðheimum sem ferðaþjónustan og atvinnulífið í Uppsveitum Árnessýslu hafði boðað þingmenn kjördæmisins á ásamt fulltrúum úr atvinnuveganefnd og fjárlaganefnd. Á annað hundrað manns mættu á fundinn og var mikill hiti í fundarmönnum.

Þingmenn stjórnarmeirihlutans fengu krefjandi spurningar og beindist hiti fundarfólks sér í lagi að þeim. Var óskað eftir skýrum svörum hvers vegna verið væri að leggja náttúru og innviðaskatt aðeins á í einu sveitarfélagi á landinu, Bláskógabyggð og einnig var óskað eftir skýrum svörum frá alþingismönnum af hverju væri ekki búið að gera áhrifamat á þessa skattlagningu áður en málið væri lagt fyrir Alþingi.

Fram kom í máli fulltrúa Sjálfstæðisflokks, Framsóknar og Miðflokks að þeir styddu það að stjórnvöld létu vinna slíkt mat en fulltrúar Viðreisnar, Flokks fólksins og Samfylkingar töldu að ekki þyrfti slík gögn heldur væri málið faglega unnið hjá ráðherra og ríkisstjórn. Vakti þetta mikla undrun fundarmanna að þessir aðilar teldu málið vera faglega unnið þegar ekki væri búið að meta hvaða áhrif það hefði að hækka skatta á þessu svæði, eina svæðinu á landinu þar sem leggja á á viðkomandi skatt.

Fjóla St. Kristinsdóttir, sveitarstjóri Grímsnes- og Grafningshrepps, í pontu. Ljósmynd/Aðsend

Knútur Ármann, eigandi Friðheima, fór vel yfir þau áhrif sem lagasetning þessi gæti haft á rekstur fyrirtækja á Gullna hringnum, samdrátt í tekjum, hagræðingu og mögulegar uppsagnir. Sagði Knútur að „aldrei yrði sátt um þessa útfærslu“ sem hefði verið kynnt í frumvarpinu. Hún væri ósanngjörn atlaga að atvinnulífi sveitarinnar sem vekur spurningar um jafnræði og samkeppnisstöðu fyrirtækja í ferðaþjónustu.

Þar sem einungis einn þingmaður stjórnarmeirihlutans úr kjördæminu mætti var Sandra Sigurðardóttir þingmaður Viðreisnar spurð að því af fundarmönnum hvort hún myndi ætla að styðja fólkið í kjördæminu og ferðaþjónustu fyrirtækin eða fara eftir þeirri línu sem að ríkisstjórnin væri búin að leggja henni. Svaraði Sandra því til að hún myndi greiða atkvæði með frumvarpinu eins og það kæmi fyrir. Vakti svar hennar mikinn kurr í hópnum og í samtölum fundargesta eftir fundinn komu fram mikil vonbrigði með þá afstöðu þingmanns kjördæmisins að standa ekki með fyrirtækjum og fólki á svæðinu.

Ljóst var á svörum að fulltrúar minnihlutans á þingi ætli að standa þétt við bakið á ferðaþjónustunni en minni stuðning var að finna hjá fulltrúum ríkisstjórnarinnar sem vitnuðu sífellt í greinargerðir og héldu því fram að skattlagning upp á 6-7 milljarða á ári á eitt sveitarfélag, Bláskógabyggð, myndi ekki hafa áhrif á komur ferðamanna á svæðið.

Fyrri greinGervigreind og öryggi á Tæknidegi OK á Selfossi