Hífandi rok og öskufjúk

Um 60 björgunarsveitamenn eru nú að störfum á öskufallssvæðinu og fjöldi verkefna liggur fyrir og felast þau flest í aðstoð við bændur við smölun á fé og öðrum búpeningi.

Einnig er verið að heimsækja alla bæi á svæðinu til að kanna aðstæður. Að auki hafa lausamunir fokið frá byggingarsvæði og hefur þurft að hefta þá.

Björgunarsveitafólkið kemur flest frá Hvolsvelli, Árborg og höfuðborgarsvæðinu. Bætt verður við fólki þegar líður á daginn.

Þegar þetta er skrifað er nokkuð bjart á Klaustri en hífandi rok og öskufjúk. Hins vegar er dimmt yfir Fljótshverfi.