Hermann Örn Kristjánsson hefur verið ráðinn í starf skólastjóra Sunnulækjarskóla á Selfossi frá og með 1. apríl næstkomandi. Alls bárust fimm umsóknir um starfið.
Hermann Örn hefur starfað við Sunnulækjarskóla síðan 2011 sem kennari og deildarstjóri. Nú síðast sem deildarstjóri Setursins, sérdeildar Suðurlands, frá 2019. Á árunum 1999 til 2011 var hann meðal annars kennari í Ölduselsskóla, sérfræðingur og fyrirtækjaráðgjafi hjá Vodafone og netsérfræðingur hjá Íslandssíma.
Hermann Örn lauk meistaragráðu í MBA frá Háskólanum í Reykjavík árið 2020 og er með B.Ed. gráðu í kennslufræðum frá Kennaraháskóla Íslands. Hann hefur einnig sótt nám í grafískri teikningu í Sketchup frá Tækniskólanum í Reykjavík og kerfisfræði frá Tölvu og verkfræðiþjónustunni í Reykjavík.