Hellisheiði og Þrengslum líklega lokað kl. 16 á mánudag

Eins og fram hefur komið í fréttum er búist við austan ofsaveðri á morgun og fram á þriðjudag á öllu landinu með snjókomu og byl. Mikill vindhraði er í kortunum.

Veðrið skellur fyrst á Suðurlandi og er ekki ráðlegt að vera á ferðinni þar eftir klukkan 12:00 á hádegi. Gera má ráð fyrir mikilli ófærð á landinu.

Samkvæmt upplýsingum frá lögreglunni á Suðurlandi hefur verið ákveðið að loka þjóðvegi 1 frá Markarfljóti að Breiðamerkurlóni fyrir allri umferð klukkan 12:00 á hádegi.

Hellisheiði, Þrengslum og Mosfellsheiði verða að öllum líkindum lokað klukkan 16:00 ef veðurspá gengur eftir og fleiri leiðir í framhaldinu, en frekari upplýsingar verða birtar á vefsíðu Vegagerðarinnar og í upplýsingasíma 1777 og 1779.

Ekkert ferðaveður verður ef spár ganga eftir.