Helga Jóhanna Úlfarsdóttir var kosin formaður á aðalfundi FKA Suðurland, Suðurlandsdeildar Félags kvenna í atvinnulífinu, sem haldinn var í Rauða húsinu á Eyrabakka í síðustu viku.
„Við höldum áfram góðu starfi FKA Suðurlands er kemur að sýnileika, tengslaneti og að hafa áhrif á samfélagsumræðuna,“ segir Helga Jóhanna sem hélt framboðsræðu á netinu þar sem hún var stödd erlendis. Helga Jóhanna er eigandi Heima Holiday Homes í Hraunmörk á Skeiðum.
Í nýrri stjórn sitja ásamt Helgu þær Íris Brá Svavarsdóttir, Íris Tinna Margrétardóttir, Ingunn Jónsdóttir, Ragna Gunnarsdóttir og ný inn í stjórn er Jessi Kingan og ný varakona er Aníta Dís Káradóttir.
Stækkandi deild á öflugu svæði
FKA Suðurland er skipað ríflega 80 konum sem koma úr fjölbreyttum starfsgreinum á Suðurlandi og fer þeim ört fjölgandi. „Við komum til með að virkja fleiri konur á svæðinu en líka vera duglegar að sækja aðra viðburði hjá FKA. Laufey Guðmundsdóttir stóð sig frábærlega og flestar úr fyrri stjórn halda áfram þannig að þetta verður frábært,“ segir Helga Jóhanna.
Landsbyggðadeildir FKS hringinn í kringum landið
Hlutverk landsbyggðadeilda innan Félags kvenna í atvinnulífinu er að efla konur um allt land og styrkja tengslanet nærumhverfis. FKA Suðurland vill efla konur til ábyrgðar og þátttöku í atvinnulífinu með jákvæðri nálgun og gleði í fyrirrúmi. Haldnir eru áhugaverðir viðburðir, bæði í samvinnu við aðrar deildir FKA og viðburðir sérsniðnir að félagkonum á svæðinu. Farið er í heimsóknir í fyrirtæki kvenna, fræðsluviðburðir haldnir og fyrirlesarar bæði aðfengnir eða úr hópi félagskvenna á Suðurlandi.
Aðalfundurinn fór sem fyrr segir fram í Rauða húsinu og fundarstjóri var Ingunn Jónsdóttir, framkvæmdastjóri Háskólafélagi Suðurlands. Gestur fundarins var Elínborg Telma Ágústsdóttir sem flutti erindið „Kona býr til podcast – Nýhugsun”.
