Míla hefur sett upp nýja vefmyndavél sem sýnir Heklu. Með tilkomu hennar verður hægt að fylgjast með hugsanlegum hræringum í fjallinu.
Þar með eru vefmyndavélar Mílu orðnar alls níu, flestar á Suðurlandi.
Fyrsta vefmyndavél Mílu var sett upp í tengslum við eldgosið á Fimmvörðuhálsi og Eyjafjallajökli. Síðan þá hefur fyrirtækið sett upp fleiri vélar, flestar á vinsælum ferðamannastöðum á Suðurlandi.
Núna eru m.a. vélar á Gullfossi og Geysi og einnig eru vélar sem sýna Kötlu og Eyjafjallajökul.