Fjölmiðlamaðurinn Heimir Karlsson verður fyrsti kostur Ö-listans í sveitarstjórastólinn í Grímsnes- og Grafningshreppi, nái Ö-listinn meirihluta í sveitarstjórnarkosningunum á morgun.
Andrés Bertelsen, oddviti listans, staðfesti þetta í samtali við sunnlenska.is í dag.
DV greindi frá því í morgun að sterkur orðrómur væri um það og ríkur vilji innan framboðsins að Heimir yrði sveitarstjóri að loknum kosningum.
Sjálfur sagðist Heimir ekki leiða hugann að þessu fyrr en hann sæi hvað kæmi upp úr kjörkössunum. Hann skipar 7. sætið á Ö-listanum og er því ekki á leið í sveitarstjórn, þar sem fimm fulltrúar sitja.
„Mér er sýndur mikill heiður með því að vera orðaður við þetta embætti og ég vil þakka fyrir það,“ sagði Heimir í samtali við DV.