Þjótandi á Hellu átti lægsta tilboðið í endurbyggingu Þingskálavegar á Rangárvöllum sem vinna á að í sumar.
Tilboð Þjótanda hljóðaði upp á 260,7 milljónir króna en öll tilboðin sem bárust voru undir áætluðum verktakakostnaði Vegagerðarinnar sem hljóðar upp á 316,9 milljónir króna.
Þrjú önnur fyrirtæki sendu inn tilboð; Mjölnir á Selfossi bauð 302,7 milljónir króna, Þróttur á Akranesi 307,9 milljónir króna og Borgarverk í Borgarnesi bauð 311,7 milljónir króna.
Um er að ræða endurbyggingu, breikkun og klæðningu á 7,5 kílómetra kafla frá Heiði á Rangárvöllum að Bolholti. Verkinu á að vera lokið þann 15. september næstkomandi.