Framkvæmdum við nýjan heilsu- og æfingastíg í Þorlákshöfn er lokið. Stígurinn er 3,4 km langur og liggur eftir göngustígum og gangstéttum bæjarins.
Upphaf og endir stígsins er við íþróttamiðstöðina en notendur stígsins geta farið inn á hann hvar sem þeim hentar. Meðfram stígnum eru fimmtán æfingastöðvar, misstórar allt frá einum staur og upp í töluvert mannvirki. Við hverja stöð er skilti með leiðbeiningum um æfingar en æfingunum er skipt upp í styrk, liðleika/fimi og úthald.
Framkvæmdirnar við stíginn hófust í vor en stígar sem þessir hafa verið settir upp víðsvegar um Evrópu á síðustu árum. Lýðheilsu verkefnið Vitaparcours (æfingastígar) hófst hjá svissnesku tryggingarfélagi fyrir árið 1970 en verkefnið hefur verið í stöðugri þróun síðan.
Æfingarnar við stíginn henta öllum, jafnt þjálfuðum sem óþjálfuðum, öldruðum, íþróttafólki og unglingum og er kjörinn fyrir kyrrsetufólk sem vill breyta um lífstíl.