Heilsugæslunni á Hellu lokað

Heilbrigðisstofnun Suðurlands hefur ákveðið að sameina heilsugæsluþjónustu í Rangárþingi og loka heilsugæslunni á Hellu.

Stofnunin þarf að minnka útgjöld um 5,5% á næsta ári eða um 120 milljónir.

Í fréttatilkynningu segir að mikil fagleg rök séu fyrir því að sameina þjónustuna á einum stað, sérstaklega þar sem ekki hafi tekist að ráða í eina stöðu læknis. Heilsugæsluþjónustan verður rekin frá heilsugæslustöðinni á Hvolsvelli og verði hún sérstakur stuðningsaðili við heilsugæslustöðvarnar í Vík og á Kirkjubæjarklaustri. Um 10 kílómetrar eru á milli Hellu og Hvolsvallar.

Gripið verður til fjölbreyttra aðgerða til að ná niður kostnaði. Selja á vaktíbúð á Selfossi og selja stóra læknisbústaði á Hellu og Kirkjubæjarklaustri. Breyta á vaktafyrirkomulagi og ræstingaþjónusta verður endurskipulögð. Auka á samþættingu heilsugæsluþjónustu í V-Skaftafellssýslu. Endurskipuleggja og hagræða á í sjúkraflutningum og fleira.