Heiðrún Kristmundsdóttir, verkefnastjóri á Selfossi og stjórnarkona hjá Körfuknattleikssambandi Íslands, leiðir lista Viðreisnar í Árborg fyrir sveitastjórnarkosningarnar í vor. Þetta er í fyrsta sinn sem Viðreisn býður fram undir eigin merki í sveitarfélaginu.
„Þegar við fjölskyldan fluttum í sveitarfélagið tókum við strax þá ákvörðun að hér vildum við ala upp börnin okkar. Árborg býður upp á öruggt umhverfi fyrir börnin og mikla nálægð við bæði náttúru og mikið tómstundastarf. Við þurfum að passa upp á það sem vel er gert hér en líka gæta þess að öll börnin okkar geti notið þessara kosta,” segir Heiðrún í samtali við sunnlenska.is.
Að sögn Heiðrúnar er uppstillingarnefnd Viðreisnar í Árborg enn að störfum en fullmótaður listi mun liggja fyrir fljótlega.
„Ég er einstaklega spennt fyrir að taka að mér að leiða þennan lista hér í Árborg. Það sem er brýnast er að tryggja velferð og öfluga þjónustu fyrir fjölskyldur og fyrir því mun Viðreisn beita sér. Ég ólst upp á kúabúi í Skeiða- og Gnúpverjahreppi en körfuboltaferillinn hefur dregið mig og fjölskyldu mína víða. Hvar sem við höfum komið niður fótum hef ég laðast að samfélaginu og fólkinu. Ég þekki það líka á eigin skinni hvað það er mikilvægt að fólk tilheyri samfélagi og ég þekki úr æsku mikilvægi þess að þjónusta sveitarfélagsins sé jafn aðgengileg öllum óháð búsetu,” bætir Heiðrún við.
Og það er keppnisskap í nýja frambjóðandanum.
„Já, ég fer alla leið í þeim verkefnum sem ég tek að mér, það er kemur frá uppeldinu í körfuboltanum og vinnusemina hef ég úr sveitinni. Hvoru tveggja hafa kennt mér eljuna að kynna mér málin, vera læs á umhverfið og þora að stíga inn í stór verkefni. Það er stórt verkefni framundan í komandi sveitarstjórnarkosningum. Árborg hefur vaxið mikið á undanförnum árum og nú þarf að takast á við vaxtarverkina, svo að enn fleiri fjölskyldur, eins og fjölskyldan mín ákveði að setjast hér að og tryggja börnunum sínum öruggt umhverfi,” segir Heiðrún að lokum.