Heiða Guðný Ásgeirsdóttir, bóndi og sveitarstjórnarkona á Ljótarstöðum í Skaftárhreppi, hefur ákveðið að gefa kost á sér í fyrsta sæti á lista Vinstrihreyfingarinnar – græns framboðs í Suðurkjördæmi í komandi alþingiskosningum.
Heiða Guðný er varaþingmaður á yfirstandandi kjörtímabili. Hún hefur setið í sveitarstjórn Skaftárhrepps í alls tíu ár í vor.
„Mín helstu áherslumál í stjórnmálum og lífinu eru umhverfismál og virðing fyrir náttúrunni, jafnrétti og mannréttindi hvers konar og íslenskur landbúnaður. Að þessum málum og fleirum langar mig að vinna áfram innan raða Vinstrihreyfingarinnar – græns framboðs,“ segir Heiða í tilkynningu.
Hún kom nýfædd heim að Ljótarstöðum í sauðburði 1978 og hefur búið þar síðan. Hún tók við búi þar eftir stúdentspróf og búfræðinám árið 2001 og er þar í dag sauðfjárbóndi að atvinnu og starfar auk þess við rúning og fósturtalningar í sauðfé um allt land.