Haustfundur kúabænda í kvöld

Fyrsti haustfundur Landssambands kúabænda verður haldinn í Þingborg í Flóahreppi í kvöld, fimmtudag kl. 20:30.

Á fundinum verður stefnumörkun Landssambands kúabænda til 2021 kynnt í fyrsta sinn. Stefnumörkunin lýsir framtíðarsýn búgreinarinnar til næstu 10 ára, auk þess sem hún útlistar með hvaða hætti LK hyggst starfa á næstu árum til hagsbóta fyrir íslenska nautgriparækt.

Auk stefnumörkunarinnar verða til umfjöllunar á fundunum framleiðslu-, sölu- og afkomumál, framkvæmd mjólkursamnings, staða lánamála bænda, greiðslumark mjólkur og kvótamarkaður, breytingar á laga- og regluumhverfi greinarinnar og staða umsóknar Íslands að ESB.

Næstu haustfundir verða haldnir á Hótel Hvolsvelli kl. 12 mánudaginn 17. október og á Hótel Geirlandi í Skaftárhreppi kl. 20:30 sama dag.