Útskriftarathafnir Fræðslunetsins voru haldnar í Gömlu Búð á Höfn 27. maí og á Hótel Selfossi 28. maí, þar sem nemendur luku námi af námsbrautum Fræðslumiðstöðvar atvinnulífsins. Það var hátíðarbragur yfir þessum dögum þar sem áfanganum var fagnað innilega af námsmönnum og aðstandendum þeirra.
Að þessu sinni luku fimm nemendur námi í Menntastoðum, sex í Menntagrunni, átta luku námi í Félagsliðagátt, níu á Leikskóla- og stuðningsfulltrúabrú og að lokum sextán af námsbrautinni Stökkpalli.
Við athöfnina á Selfossi flutti Eyjólfur Sturlaugsson, framkvæmdastjóri Fræðslunetsins, stutt ávarp þar sem hann nefndi að núna væru nemendur búnir að láta drauma sína rætast og nýjir draumar eflaust orðið til.
Fyrrum nemandi Fræðslunetsins af námsbrautinni Menntastoðum, Einar Þór Guðmundsson flutti tvö lög og að lokum flutti Ásta Björg Jósepsdóttir ávarp fyrir hönd nemenda. Hún nefndi meðal annars hvað námið hjá Fræðslunetinu hafi gefið henni aukna trú á eigin getu en hún var áður búin að prófa fjarnám við nokkra framhaldsskóla. Það sem henni fannst henta sér mjög vel við skipulag námsins hjá Fræðslunetinu var að einungis er einn áfangi kenndur í einu og því gott að einbeita sér alfarið að þessum eina áfanga. Eftir námið í Menntastoðum ætlar Ásta að halda áfram ótrauð í námi hjá Keili – Háskólabrú.
Það er gaman að geta þess að nemendur Fræðslunetsins koma víða að, ekki bara af starfssvæðinu heldur voru nokkrir nemendur í vetur af höfuðborgarsvæðinu en kennslan fer fram í dreifnámi á Teams.
Innritun fyrir nám á haustönn er þegar hafin og eins og áður er hægt að velja um nokkrar námsbrautir og áfanga á framhaldsskólastigi.
