Laugardaginn 28. febrúar kynna allir háskólar landsins fjölbreytt námsframboð sitt á Háskóladeginum í Reykjavík. Dagurinn er samstarfsverkefni allra háskóla landsins og ómissandi fyrir þau sem hyggja á háskólanám.
Á Háskóladeginum gefst einstakt tækifæri til að hitta kennara, nemendur og námsráðgjafa — spyrja spurninga, fá góð ráð og sjá allar þessar fjölbreyttu og spennandi leiðir sem eru í boði hjá Háskólanum á Akureyri, Háskóla Íslands, Háskólanum á Hólum, Landbúnaðarháskóla Íslands, Háskólanum á Bifröst, Háskólanum í Reykjavík og Listaháskóla Íslands.
„Það eru öll hjartanlega velkomin á Háskóladaginn,“ segir Laila Sæunn Pétursdóttir, verkefnastjóri Háskóladagsins, „hvort sem fólk veit nákvæmlega hvað það vill læra eða er enn að skoða möguleikana. Háskóladagurinn getur ekki bara breytt stefnu fólks, hann getur hreinlega breytt lífinu. Ég segi bara, ekki missa af þessu frábæra tækifæri að finna nám sem hentar þér og þínu áhugasviði.“
Kynningarnar fara að þessu sinni fram í Háskóla Íslands (Háskólatorgi, Sögu og Öskju), Háskólanum í Reykjavík og Listaháskóla Íslands í Stakkahlíð.
● Háskólinn á Akureyri verður í Háskólanum í Reykjavík og Sögu í HÍ.
● Háskóli Íslands verður í húsakynnum sínum, Háskólatorgi, Sögu og Öskju.
● Háskólinn í Reykjavík verður í húsakynnum sínum.
● Háskólinn á Bifröst verður í öllum þremur háskólunum á höfuðborgarsvæðinu.
● Listaháskólinn verður í húsakynnum sínum í Stakkahlíð, Háskólanum í Reykjavík og í Sögu í HÍ.
● Landbúnaðarháskólinn verður í öllum þremur háskólunum á höfuðborgarsvæðinu.
● Háskólinn á Hólum verður á Háskólatorgi HÍ.
Hægt er að hoppa frítt á milli staða en Hopp býður upp á fríar ferðir ef lagt er í Hoppstæði við Grósku, HÍ, HR eða LHÍ Stakkahlíð.
Í kjölfar Háskóladagsins í Reykjavík ferðast hann um landið og verður 3. mars í Vestmannaeyjum, 5. mars á Ísafirði og 11. mars á Akureyri.