Hart deilt um leikskólalokun á Hellu

Á síðasta fundi hreppsnefndar Rangárþings ytra gerðu fulltrúar minnihlutans í Á-listanum athugasemdir við hvernig ákvörðun um sumarlokun leikskólanna í sveitarfélaginu var tekin. Á-listinn telur að meirihlutinn hafi brotið nýsamþykktar siðareglur sveitarfélagsins.

Fyrr í vetur hafði fræðslunefnd sveitarfélagsins í tvígang fjallað um sumarlokanir Leikskólans á Laugalandi og Heklukots á Hellu og vinnuhópur var skipaður af sveitarstjórn til að funda með hagsmunaaðilum.

Eftir rækilega yfirferð komst fræðslunefndin að þeirri niðurstöðu að loka ætti báðum leikskólunum í fimm vikur frá 1. júlí til 2. ágúst. Niðurstaða fræðslunefndar var fengin eftir að leitað var álits frá foreldrafélögum beggja leikskólanna.

Áður hafði fyrirtækið Reykjagarður sent sveitarfélaginu bréf þar sem farið var fram á að leikskólanum Heklukoti á Hellu verði ekki lokað á sumrin og starfið verði skipulagt á annan hátt. Fræðslunefnd benti þá á reglugerð sem segir að gert sé ráð fyrir því að leikskólabörn fái að minnsta kosti fjögurra vikna sumarleyfi.

Á síðasta fundi hreppsráðs lagði meirihlutinn síðan fram þá tillögu að sumarlokun Heklukots yrði frá 15. júlí til 12. ágúst og tók þannig ekki til greina niðurstöðu fræðslunefndar. Endanleg tillaga sem samþykkt var á hreppsnefndarfundinum á föstudaginn var sú að sumarlokun Heklukots verði frá 15. júlí til og með 16. ágúst.

„Tillagan var ekki samþykkt í hreppsráði, en þrátt fyrir það fær leikskólastjóri þau skilaboð að meirihlutinn sé sammála henni og tilkynning um hana er send á alla foreldra. Þetta er afar bágborin stjórnsýsla að okkar mati og ekki til fyrirmyndar,“ segir í bókun minnihlutans á hreppsnefndarfundi sl. föstudag en á sama fundi voru nýjar siðareglur fyrir kjörna fulltrúa og aðra stjórnendur sveitarfélagsins samþykktar.
Og bókun minnihlutans heldur áfram: „Við teljum að brotin hafi verið 2. grein nýsamþykktra siðareglna sveitarfélagsins þar sem segir: „Kjörnir fulltrúar skulu gæta þess að fara ekki út fyrir umboð sitt í störfum sínum og virða verkaskiptingu í stjórnkerfi Rangárþings ytra“.“
Meirihlutinn svaraði minnihlutanum með bókun þar sem segir að tillagan frá hreppsráðsfundinum hafi verið gerð eftir samráð við leikskólastjóra Heklukots og vegna ábendinga frá atvinnurekendum og foreldrum. „Það er mat meirihlutans að sú leið sem lögð er til verði til hagsbóta fyrir flesta. Mat okkar var að almennur vilji væri fyrir því að koma á breytingum sem fyrst. Við teljum að siðareglur hafi ekki verið brotnar og að meiri hluti sveitarstjórnar sé að uppfylla skyldur sínar,“ segir í svari meirihlutans.
Ljóst er að málinu er ekki lokið því fulltrúar Á-lista létu bóka í lokin að þeir áskilja sér rétt til þess að leggja fram bókun um málið á næsta fundi.
Fyrri greinÁrborg opnar kynningarsíðu á Facebook
Næsta greinDagbók lögreglu: Unglingur tekinn með kannabis