Harður árekstur varð á Suðurlandsvegi undir Ingólfsfjalli laust fyrir klukkan 16 í dag þegar fólksbíll lenti aftan á ferðahýsi sem jeppabíll hafði í eftirdragi.
Tveir voru í hvorum bíl og var fólkið flutt til skoðunar á slysadeild Heilbrigðisstofnunar Suðurlands en samkvæmt upplýsingum frá lögreglunni á Suðurlandi voru meiðsli þess talin minniháttar.
Talsverður viðbúnaður var vegna slyssins, þung umferð var á staðnum og var Suðurlandsvegur lokaður til austurs um tíma á meðan viðbragðsaðilar athöfnuðu sig á vettvangi. Umferð var á endanum beint um Ölfusveg eftir að mikil teppa hafði myndast.
Tækjabíll frá Brunavörnum Árnessýslu var kallaður á vettvang en að sögn Lárusar Kristins Guðmundssonar, setts slökkviliðsstjóra, þurfti ekki að beita klippum til að ná fólkinu úr fólksbílnum, heldur voru slökkviliðsmenn á staðnum til að tryggja vettvanginn og annast hreinsunarstarf. Fólksbíllinn og ferðahýsið eru mikið skemmd eftir áreksturinn.