Harður árekstur varð á gatnamótum Suðurhóla og Háheiðar á Selfossi laust fyrir klukkan átta í morgun.
Jeppa var þar ekið af Suðurhólunum inn á Háheiði í veg fyrir jeppling sem kom úr gagnstæðri átt.
Ökumenn bílanna voru einir á ferð og var annar þeirra fluttur á slysadeild HSu á Selfossi til skoðunar. Bílarnir eru mikið skemmdir.
Tækjabíll frá Brunavörnum Árnessýslu var kallaður á vettvang til þess að hreinsa olíu af veginum og á meðan stýrði lögreglan umferð um vettvang slyssins.