Kvenfélagskona ársins 2025 hjá Sambandi sunnlenskra kvenna er Jóhanna Bríet Ingólfsdóttir á Hrafnkelsstöðum í Hrunamannahreppi. Viðurkenningin var veitt á 98. ársfundi sambandsins sem haldinn var á Flúðum í síðustu viku.
Í greinargerð frá stjórn Kvenfélags Hrunamannahrepps sem tilnefndi hana segir meðal annars að Jóhanna, eða Hanna eins og hún er jafnan kölluð, hafi unnið ötullega að félagsstörfum í sveitinni og unnið þar mikla sjálfboðavinnu. Má þar fyrir utan kvenfélagið m.a nefna Hestamannafélagið Smára og reiðhöllina á Flúðum, kirkjukórinn og sóknarnefndina í Hruna hvar hún á enn sæti sem gjaldkeri.
Þegar Hrunakirkja varð 150 ára 2015 þá saumaði Jóhanna ásamt vinkonu sinni altarisdúk fyrir kirkjuna, harðangur og klaustur, sem þær gáfu kirkjunni. Hún er alltaf með eitthvað á prjónunum og fellur sjaldnast verk úr hendi.
Jóhanna gekk í Kvenfélag Hrunamannahrepps fljótlega eftir að hún flutti að Hrafnkelsstöðum árið 1965. Hún sat í stjórn félagsins sem gjaldkeri 1979-1985. Félagið átti lengi hlut í Félagsheimili Hrunamanna og vann Jóhanna mikið á vegum félagsins tengt þeim hlut. Í mörg ár sá hún um að halda utanum sölu á prjónlesi félagskvenna sem selt var í félagsheimilinu þegar þar var starfrækt hótel. Jóhanna hefur starfað í nefndum á vegum félagsins í gegnum árin og við veitingar. Núna síðustu ár hefur hún nánast alltaf verið við uppþvottavélina í erfidrykkjum sem voru t.d. sex talsins árið 2025. Í það hefur hún komið beint eftir útför úr söng með kirkjukórnum og henni hefur svo ekki munað um að smyrja flatkökur fyrir athöfn ef þurft hefur.