Síðastliðinn föstudag lentu tvö mótorhjól erlendra ferðamanna í árekstri á Biskupstungnabraut norðan við Geysi. Ökumaður annars hjólsins var fluttur handleggsbrotinn á sjúkrahús.
Tildrög slysins eru talin vera þau að ökumaður rútu sem mætti hjólunum var að aka framúr reiðhjólamanni og til þess þurfti hann að fara yfir miðlínu vegar. Það varð til þess að ökumaður fremra mótorhjólsins hægði á sér og sá sem næstur kom í röð þriggja mótorhjóla náði ekki að bregðast við í tíma og ók aftan á félaga sinn og bæði hjólin enduðu utan vegar.
Mikil umferð er á þessum stað, bæði vélknúinna ökutækja og ferðamanna á reiðhjólum. Samkvæmt talningu Vegagerðarinnar er sumardagsumferð á teljara við Myrkholt 1.300 bílar og mesta umferð um veginn á síðasta ári var 2.255 bílar þann 5. ágúst.