Handarbrotin í Hrafntinnuskeri

Mynd úr safni. Ljósmynd/Rúnar Ingi Gunnarsson

Björgunarmenn á hálendisvakt björgunarsveita í Landmannalaugum voru kallaðir út í morgun vegna slasaðrar ferðakonu við Hrafntinnusker sem er fyrsti skálinn á gönguleiðinni Laugavegur, milli Landmannalauga og Þórsmerkur.

Fyrstu upplýsingar voru á þann veg að viðkomandi væri illa brotin á hendi. Voru björgunarmenn komnir í Hrafntinnusker um einni og hálfri klukkustund síðar og bjuggu þá um konuna til flutnings. Reyndust áverkar vera minni en fyrstu upplýsingar gáfu til kynna en þó minniháttar brot. Björgunarmenn munu flytja hana í Landmannalaugar en þaðan fer hún til byggða og til læknis.

Nokkuð mikið hefur verið um útköll vegna göngumanna á hálendisvakt björgunarsveita það sem af er sumri. Í gær fóru þeir björgunarmenn sem manna hálendisvaktina á Sprengisandi til aðstoðar manni sem var að ganga frá Nýjadal að Drekagili við Öskju. Voru þar tveir ferðalangar saman og annar ógöngufær vegna áverka á fæti. Var honum ekið í Nýjadal þaðan sem hann fór til byggða undir læknishendur. Hélt félagi hans áfram göngunni í Drekagil.

Fyrri grein„Vor í holtinu“ í Selvogi á sunnudag
Næsta greinKomin hringinn í kringum landið og rúmlega það