Hamingjukrukkum dreift út í samfélagið

Börnin í Barnaskólanum á Eyrarbakka og Stokkseyri héldu upp á baráttudag gegn einelti í gær, 8. nóvember, með eftirminnilegum hætti.

1.-3. bekkur hafa síðustu daga verið að vinna verkefni tengt því. Þeim finnst að einelti eigi hvergi rétt á sér, hvorki á vinnustaðnum þeirra, í skólanum, né annars staðar í samfélaginu. Til að vekja athygli á því hafa þau búið til og safnað saman í ofurlitlar hamingjukrukkur jákvæðum orðum sem þau fóru með með út í samfélagið þennan dag og deila með fólkinu sem þar er.

Nemendur fóru á nokkra staði í samfélaginu við ströndina, fangelsið á Litla-Hrauni og á leikskólana Brimver og Æskukot. Einnig var farið í verslanirnar Skálann á Stokkseyri og Bakkann á Eyrarbakka. Eldri borgarar svæðisins voru einnig heimsóttir en farið var með hamingjukrukkur á dvalarheimilin Sólvelli og Kumbaravog.

Krakkarnir gera sér fulla grein fyrir því að falleg og vinaleg orð og setningar eru best til þess fallin að nota í samskiptum fólks í leik og starfi.

Mæltu þau með því að hamingjukrukkan yrði sett á góðan stað í fyrirtækjunum sem þau heimsóttu þannig að fólk geti dregið sér miða út krukkunni í upphafi hvers vinnudags og látið fallega hugsun fylgja athöfnum dagsins. Síðan er miðanum aftur stungið í krukkuna og getur hann því komið öðrum að gagni síðar.

Eldri bekkir skólans, 4.-10. bekkur, nýttu eina kennslustund í gær í það að ræða einelti og skoða nokkur stutt myndskeið um einelti. Hvernig þolanda eineltisins líður og hvernig við getum brugðist við til þess að viðkomandi líði betur í sínum skóla, á sínum vinnustað.

Hér fyrir neðan eru myndir af nemendum að að útbúa krukkur og úr tveimur heimsóknunum sem þau fóru í fyrirtækin og stofnanir á ströndinni.