Hamingjudagar í Hveragerði

Í síðustu viku voru þemadagar á yngsta stigi Grunnskólans í Hveragerði. Yfirskriftin var hamingjan og var unnið með hugtakið á fjölbreyttan hátt.

Öllum nemendum var skipt í þrjá stóra hópa sem fóru á þrjár stöðvar, þar sem þeim var aftur skipt í minni hópa. Hóparnir fóru á nýja stöð á hverjum degi þar sem þeir fengust við margvísleg verkefni.

Farið var í sáningarferð í gróðurhúsið sem við höfum aðgang að á Landbúnaðarháskólanum á Reykjum í Ölfusi. Þar var einnig farið í Bananahúsið og tilraunahúsið og m.a. skoðað erfðabreytt bygg. Á sömu stöð fóru nemendur í smiðjur og saumuðu og smíðuðu gripi sem þau skreyttu með orðum sem tengjast hamingjunni. Í myndmennt sköpuðu nemendur hamingjuhnött þar sem allir íbúar voru að sjálfsögðu mjög hamingjusamir.

Í Mjólkurbúinu þar sem 1. bekkur er til húsa var farið í yoga, kennt að nudda bakið á næsta manni og litaðar mandölur við rólega tónlist sem á að vera afar slakandi og gera fólk hamingjusamt. Farið var í Art þar sem útbúnar voru hamingjusamar persónur í fullri stærð. Í íþróttahúsinu var farið í Tarsanleik þar sem allir fengu góða útrás og urðu þar af leiðandi mun hamingjusamari.

Inni í „stóra“ skóla var farið í tónmennt þar sem sungin voru lög sem tengjast hamingjunni, dansað, breikað og trallað. Á þeirri stöð voru hengdar upp trjágreinar sem voru skreyttar með vaxi og hjörtum sem á voru skrifuð jákvæð orð. Síðast en ekki síst voru bakaðar hamingjumúffur sem bornar voru fram í fjölsóttu foreldrakaffi sem haldið var þann 9. mars.

Í pistli Ernu Ingvarsdóttur á heimasíðu skólans segir að þessir dagar hafi tekist mjög vel og gert skólastarfið venju fremur skapandi og skemmtilegt. Nemendur hafi verið afar áhugasamir og tekið þátt af lífi og sál.